Fireman yasezeranye mu mategeko n’umukunzi we Charlotte

Umuraperi Fireman nyuma y’umwaka yambitse umukunzi we Kabera Charlotte impeta y’urudashira amusaba kubana NA WE akaramata, basezeranye imbere y’amategeko.

Fireman ati ubu ni uwange byemewe

Kuri uyu wa Kabiri, tariki 4 Mutarama 2022, nibwo basezeranye imbere y’amategeko mu muhango wabereye mu Murenge wa Mwurire mu Karere ka Rwamagana.

Fireman yasezeraanye n’umukunzi we nyuma y’uko muri Kanama 2020 yari yasabye Charlotte ko yamubera umugore we ubuziraherezo.

Gusa yaje kuba akomwa mu nkokora n’urubanza yaregwagamo n’Ubushinjacyaha bwa gisirikare, aho yari akurikiranyweho ibyaha byo gukubita no gukomeretsa byakorewe ku Kigo Ngororamuco cya Iwawa. Ariko urukiko rwaje kumugira umwere kuri ibi byaha mu Ugushyingo 2021.

Nyuma yo kugirwa umwere Francis uzwi nka Fireman yahise asubukura iby’ubukwe bwe, aho yahereye ku gusezerana imbere y’amategeko kuri uyu wa 4 Mutarama, 2022.

Abinyujije ku mbuga ze nkoranyambaga, Fireman yagize ati “Kuva ubu ni uwange byemewe.”

Ubwo yasezeranaga imbere y’amategeko yari aherekejwe n’abandi baraperi barimo Jay-C n’abandi bari baje kumushyigikira.

Fireman ni umwe mu bahanzi bazamukiye mu itsinda Tuff-Gang ryari rigizwe na Bull-Dog, P-Fla na nyakwigendera Jay-Polly.

Fireman yasezeranye imbere y’amategeko n’umukunzi we Charlotte

Fireman ashyira umukono ku isezerano ryo gushyingirwa

Umuhango wo gusezerana imbere y’amategeko wabereye mu murenge wa Mwurire muri Rwamagana

Charlotte arahirira kubera Fireman umugore

Ubwo bahabwaga urupapuro ruhamya ko basezeranye mu mategeko

NKURUNZIZA Jean Baptiste
UMUSEKE.RW