Inkuru Nyamukuru
Startimes yatangije shene nshya izajya ihitisha ibiganiro na Filime mu Kinyarwanda
Sosiyete ya StarTimes, yatangije shene nshya yitwa GANZA TV izajya ihitisha ibiganiro n’amafilime mpuzamahanga mu rurimi rw’ikinyarwanda.
Ni shene yatangiye kugaragara ku murongo w’103 ku bakoresha ifatabuguzi rya startimes bifashisha anteni z’udushami cyangwa kuri 460 ku bakoresha anteni y’igisahani.
Mu kiganiro n’itangazamakuru cyabaye none kuwa 08 Ugushyingo 2023, umuyobozi w’ishami ry’iyamamazabikorwa muri StarTimes, NKURIKIYIMANA Modeste, yavuze ko abafatabuguzi ba StarTimes bakunda filimi n’ibiganiro bitandukanye bahishiwe byinshi kuko bagiye kujya babikurikira mu rurimi rw’ikinyarwanda.
Ati “Nta munsi n’umwe umufatabuguzi wa StarTimes azigera yicwa n’irungu cyangwa ngo ntaryoherwe na filime nziza tubagezaho. Ni igihe cyo gutekereza neza ukaruhuka ndetse ukagirana ibihe byihariye n’umuryango wawe, mwirebera ibiganiro na filimi nziza zisobanuye mu Kinyarwanda kandi zigezweho.”
Umuyobozi Mukuru wungirije wa Startimes Rwanda, Chen Dachuan, yavuze ko kuva tariki ya 01 Ugushyingo 2023, Ganza TV, igaragara amasaha makumyabiri 24/24 iminsi 7/7 kuri shene y’103 ku bakoresha anteni y’udushami naho ku bakoresha igisahani bayirebera kuri shene ya 460; aho yerekana ibiganiro n’amafilime arimo ayo muri Amerika y’amajyepfo, Filipine, Turikiya, Nigeria, Uganda, Kenya, Tanzania ndetse n’ahandi; zose ziri mu Kinyarwanda.
Startimes imaze imyaka 35 ibayeho, yerekana amashusho atandukanyeb ifite intego y’uko buri Munyafurika wese yegerezwa serivisi zimuhendukiye kandi zimufasha gusangira n’abandi ubwiza bw’itumanaho rigezweho.
Startimes niyo Kompanyi ya mbere muri Afurika itanga serivisi z’amajwi n’amashusho agezweho (Digital television), ikaba itanga izo serivisi kubarenga Miliyoni 45 mu bihugu bisaga 30.
Startimes ifite amashene asaga 700 ihitisha ibiganiro bitandukanye ndetse n’amafilime muri Afurika no ku yindi migabane.
