Nyamagabe: Abantu 175 barimo abanduye COVID-19 bafatiwe mu rugo rw’umuturage basenga

Polisi ikorera mu Karere ka Nyamagabe,kuwa Gatandatu tariki ya 29 Mutarama 2022, yasanze abaturage 175 mu rugo rw’umuturage basenga kandi barenze ku mabwiriza yo kwirinda COVID-19.

Aba baturage hari abasanzwemo Covid-19

Urugo barimo ni urwa Nyirahuku Marie Rose wo mu Murenge wa Gasaka,Akagari ka Kigeme Umudugudu wa Gakoma.

Mu igenzura ry’ibipimo byakorewe ku bantu 175 byagaragaye ko harimo babiri banduye COVID-19,abandi babiri batarikingije urukingo na rumwe naho abandi batandatu bakingiwe urukingo rumwe gusa.

Umuvugizi wa Polisi mu Ntara y’Amajyepfo,SP kanamugire Theobald, yavuze ko gufatwa kwabo byaturutse ku makuru yatanzwe n’abaturage.

Yavuze ko ubwo Polisi yajyaga muri urwo rugo, yasanze begeranye, bamwe bari mu nzu abandi bari hanze kandi nta muntu wambaye gapfukamunwa muri icyo cyumba cyari gifunganye.

SP kanamugire yanenze imyitwarire y’abantu bagikerensa amabwiriza yo kwirinda COVID-19, abasaba kwisubiraho.

Ati “COVID-19 ntaho yagiye iracyahari. Nta muntu ugomba kwirara yibwira ko icyorezo cyarangiye. Amabwiriza arahari kandi agomba kubahirizwa bariya bantu bagombaga kujya gusengera mu nsengero zujuje ibisabwa kandi zirahari.”

SP kanamugire yavuze ko abafashwe bigishijwe kandi abatarakingirwa bahita bakingirwa, abanduye bashyirwa mu kato.

Ni mu gihe kandi inzego zibishinzwe zabaciye amande hakurikijwe amabiriza y’inama njyanama y’Akarere.

TUYISHIMIRE RAYMOND / UMUSEKE.RW