Novak Djokovic wanze gukingirwa COVID-19 yatsinze urubanza rwo kumukumira muri Australia

Umucamanza wo muri Australia yategetse ko umukinnyi wa mbere ku isi muri Tennis mu bagabo, Novak Djokovic visa ye ifite agaciro, ndetse ko ahita afungurwa akava mu kigo gifungirwamo abimukira.

Novak yavuze ko atakwemera ko akingirwa ku gahato

Anthony Kelly kuri uyu wa Mbere mu rubanza Isi yose yari ihanze amaso, yategetse ko Novak Djokovic afungurwa mu minota 30, agasubizwa impapuro ze z’inzira.

Ibi biraha amahirwe uyu mukinnyi yo kuzitabira imikino ya Tennis ikomeye ibera muri Australia (Australian Open) ndetse akaba ahabwa amahirwe yo kuritwara ku nshuro ya 10.

Leta ya Australia yategetswe kuzishyura ikiguzi cy’ibyo Djokovic yakoresheje mu rubanza rwe.

Novak w’imyaka 34 akomoka muri Serbia yageze muri Australia (Melbourne) ku wa Kane w’icyumweru gishize agiye mu mikino y’irushanwa rya Australian Open rizatangira tariki 17 Mutarama, 2022.

Gusa iki gihugu cyaje gutangaza ko atujuje ibisabwa mu bijyanye n’amabwiriza yo kwirinda Covid-19 kuko yanze gukingirwa, kandi bikaba byarigeze kuvugwa ko yanduyse Covid-19 ariko nyuma akaza kuyikira.

We yavugaga ko inzego z’ubuzima muri Australia zamuhaye uruhushya rudasanzwe kugira ngo abe yakwitabira iriya mikino nubwo atakingiwe Covid-19.

Nyuma yo gufatwa akajyanwa ahafungirwa abimukira, bukeye yajyanywe muri hoteli yitwa Park Hotel iri mu mujyi wa Melbourne.

Ukeneye kwamamaza! Gusobanuza! Gutanga amakuru? Hamagara 0788772818

IVOMO: al Jazeera

UMUSEKE.RW