DRC: Abarwanyi barenga 10 ba M23 biciwe mu mirwano

Ingabo za Leta ya Congo zivuga ko zishe abarwanyi 11 b’inyeshyamba za M23, nyuma y’imirwano yabereye mu ishyamba rya Pariki ya Virunga.

Ku wa Gatandatu abasirikare 29 ba FARDC bashyinguwe mu cyubahiro

Hashize iminsi mike muri Repubulika ya Demokarasi ya Congo hubuye imirwano hagati y’abahoze ari inyeshyamba za M23, ubu biyise Armee Revolutionnaire Congolaise bahanganye n’ingabo za Leta, FARDC.

Ku Cyumweru umwe mu ngabo za DRCongo yabwiye Ibiro Ntaramakuru AFP ko abarwanyi 11 ba M23 biciwe mu mirwano.

Yavuze ko abo barwanyi biciwe mu gitero cy’ingabo za Leta ku wa Gatanu tariki 28 Mutarama, 2022.

Col Honore Rindugu, ukuriye ingabo ku mupaka RDCongo ihuriyeho n’u Rwanda na Uganda, yavuze ko inyeshyamba zapfuye zishobora kuba zirenga 11.

Yavuze ko mu ibanga babashije kumva itumanaho rya M23 bavuga ko abarwanyi 30 baburiwe irengero.

Ku wa Gatandatu tariki 29 Mutarama, 2022 ingabo za Leta zashyinguye mu cyubahiro abasirikare 29 barimo Colonel baguye mu gitero cya M23.

Mu ijoro ryo ku wa Mbere w’icyumweru gishize, i Nyesisi, mu Ntara ya Kivu ya Ruguru hafi y’ishyamba rya Pariki ya Virunga, habereye imirwano ikomeye aho M23 yishe abasirikare ba Leta barenga 20.

Abakozi ba Croix Rouge muri kariya gace bavuze ko abasirikare 32 ba Leta baguye muri icyo gitero.

Umutwe wa M23 ari mu isaga 120 yitwaje intwaro ikorera mu Burasirazuba bwa DRCongo, usaba Leta ya Congo kubahiriza amasezerano yasinyiwe i Nairobi ateganya uburyo bwo gusezerera abari abarwanyi abanda bakinjira mu ngabo za Leta.

Lt Gen Ndima KONGBA Umuyobozi wa gisirikare w’Intara ya Kivu yasabye imiryango y’abasirikare bapfuye kwihangana

UMUSEKE.RW