Tanzaniya Yaciye Interneti ku Munsi w’Amatora, Ikumira Indorerezi

 1,000 total views,  1 views today

Muri Tanzaniya, abaturage biriwe mu matora y’umukuru w’igihugu n’inteko ishinga amategeko. Imbuga nkoranyambaga zafunzwe. Abaturage bagera kuri miliyoni 29 bageze mu myaka yo gutora bagomba guhitamo umuntu umwe mu bakandida 15 baharanira intebe y’umukuru w’igihugu.

Muri aba bakandida harimo Perezida John Magufuli (w’imyaka 60 y’amavuko) ushaka manda ya kabiri. Ahararariye ishyaka Chama Ca Mapinduzi, CCM, bivuze Ishyaka rya Revolisiyo, riri ku butegetsi ryonyine gusa kuva mu 1961.

Uwo bahanganye kurusha abandi ni Tundu Lissu, umunyamategeko w’imyaka 52 y’amavuko. Ahagarariye ishyaka Chadema. bishatse kuvuga Ishyaka rya Demokarasi n’Iterambere). Mu 2017, Lissu yarasiwe amasasu 16 ku irembo iwe i Dodoma n’abantu batigeze bamenyekana. Yabazwe inshuro 20 mbere yo gukira ariko byamusigiye ubumuga. Ubu agenda acumbagira. Yemeza ko ari ubwicanyi bwa politiki bwamwibasiye.

Akimara gutorera mu mujyi wa Dodoma, umurwa mukuru w’ubutegetsi, Perezida Magufuli yatangaje ko “uyu ari umunsi ukomeye muri demokarasi ya Tanzaniya.” Ati: “Imyiteguro yagenze neza.”

Iyi myiteguro yose no kwiyamamaza byabaye batitaye kuri virusi ya Corona. Kwiyamamaza kandi byabayemo n’urugomo. Abatavuga rumwe na leta bemeza ko polisi yishe abantu benshi, barimo icumi byibura mu kirwa cya Zanzibar.

Naho Tundu Lissu yatangaje ku rubuga rwe rwa Twitter ko amatora yabayemo amakosa menshi akomeye. Urugero: aremeza ko hari aho indorerezi zitemerewe kwinjira aho abaturage batorera, kandi ko hari udusanduku abe batahuye twuzuye impapuro z’amajwi mbere y’amatora nyirizina.

Abandi banyatanzaniya benshi bo bemeza ko biriwe bafite ingorane zo gukoresha imbuga nkoranyambaga. Abayobozi b’iyitwa VPN n’ikigo NetBlocks kigenzura Internet na Twitter bemeza ko leta ya Tanzaniya yagerageje gufunga imbuga nkoranyambaga.

Perezida wa Tanzaniya atorerwa imyaka itanu. Igihe amajwi azatangarizwa ntikiramenyekana.

Leave a Reply

Your email address will not be published. Required fields are marked *