SUDANI: Igisirikare cyanze gutanga uwari Perezida Omar Bashirmuri mu rukiko

 215 total views,  1 views today

Igisirikare cya Sudani cyatangaje ko kidateganya gushyikiriza Urukiko Mpuzamahanga Mpanabyaha (ICC) Perezida Omar Bashir cyavanyeho ngo akurikiranwe ku byaha uru rukiko rumaze igihe rumushinja.

Ibi Igisirikare cya Sudani cyabitangaje mu itangazo cyashyize ahagaragara kuri uyu wa Gatanu ko Bashir azaburanishirizwa mu gihugu cye.

Ibi kandi byatangajwe nyuma y’uko Human Rights Watch ihamagariye Igisirikare cya Sudani guta muri yombi Bashir no kumwohereza I La Hague ku cyicaro cya ICC nk’uko tubikesha Chimpreports.

Abayobozi bagomba kubahiriza manda z’Urukiko Mpuzamahanga Mpanabyaha zo guta muri yombi Al-Bashir kubera ibyaha ndengakamere muri Darfur, kimwe na manda ya Ahmed Haroun,, umuyobozi w’agateganyo w’ishyaka riri ku butegetsi igihe kirekire, National Congress Party, nawe ushakishwa na ICC kubera ibyaha byo muri Darfur,” ibi ni ibikubiye mu itangazo rya HRW ryo mu ijoro ryo kuri uyu wa Kane.

Kuwa 04 Werurwe 2009 na 12 Nyakanga 2010, nibwo ICC yasohoye manda zo guta muri yombi Omar Al-Bashir kubera ibyaha bitanu byibasiye inyokomuntu (ubwicanyi, kurimbura, kohereza ku ngufu, iyicarubozo no gufata ku ngufu), ibyaha bibiri by’intambara (kuyobora ibitero ku basivili ku bwende cyangwa kwibasira abasivili batari mu makimbirane no gusahura), ndetse n’ibyaha bitatu bya jenoside byakorewe amoko ya Fur, Masalit na Zaghawa muri Darfur kuva mu 2003 kugeza mu 2008.

Abayobozi batandukanye b’ibihugu bya Afurika ariko banze kubahiriza izi manda ngo bafate Bashir bamwoherereze ICC nko muri Afurika y’Epfo.

Ubutegetsi bwa Omar Al-Bashir bwahiritswe kuri uyu wa Kane n’imyigaragambyo ikaze y’abaturage yagiye ibera mu mijyi minini kuva mu Ukuboza 2018, aho bamaganaga irindimuka ry’ubukungu banasaba Bashir kuva ku butegetsi.

Leave a Reply

Your email address will not be published. Required fields are marked *