Connect with us

ENTERTAINMENT

Uganda:Weasel avuga ko adaheruka kujya mu kabyiniro

 226 total views,  3 views today

Umuhanzi Weasel wo mu gihugu cya Uganda yahishuye ukuntu kwakira urupfu rwa Radio na n’ubu bikimugoye, ukuntu yahagaritse kujya mu tubyiniro kubera kwirinda kumva indirimbo bakoranye zikamumwibutsa, n’ukuntu urupfu rwe rwatumye abahanzi bo muri Uganda barushaho kwishyira hamwe.

Ubusanzwe kubura uwo ukunda ntabwo ari ikintu cyoroshye guhita ukira, ndetse bifata igihe kugirango ubyakire. Mu ntangiriro z’uyu mwaka wa 2018 nibwo igihugu cya Uganda cyabuze umuhanzi wari ufite impano y’igitangaza muri muzika,  Mowzey Radio wapfuye azize igikomere mu mutwe yatewe n’imirwano yavutse mu kabari yari arimo.

Mugenzi we babanaga mu itsinda Good Lyfe, ari we Weasel yakomeje wenyine akora indirimbo ze, rimwe na rimwe afatanya n’abandi bahanzi nka King Saha, ariko yemeza ko n’ubu atarongera kuba nk’uwo yari we kuva yabura umwunganzi we yafataga nk’umuvandimwe.

Uyu muhanzi akaba aherutse guhishurira umunyamakuru Adelle wa Kiss Fm yo muri Kenya, ko mu by’ukuri byari bigoye kubura Radio. Yavuze ko yaje kuba ahagaritse kujya mu tubyiniro igihe  gito kubera ko atabashaga kwihanganira kumva indirimbo bakoranye kuko zatumaga yongera kumwibuka bikamutera agahinda.

Weasel ndetse yicuza ukuntu yajyaga yirengagiza Radio amuhamagaye kuri telephone ndetse rimwe na rimwe akamusiga atamubwiye aho agiye, bikaba byaramwigishije guha agaciro ubucuti cyane. Weasel kandi avuga ko urupfu rwa Radio rwatumye abahanzi bo muri Uganda bashyira hamwe.

Yavuze ko mbere y’uko Radio Apfa abahanzi bahoraga mu byo bita beef mu isi y’abahanzi. Ati: “Ubwo radio yari akiriho, abahanzi bahoraga barwana. Ariko amaze gupfa, bose bagerageje kujya hamwe kandi ntibakirwana kubera ko benshi muri bo bamennye agaciro ko kugira ubumwe. Icyo nicyo kintu cyiza cyabaye,”

Uyu muhanzi kuri ubu uri mu gihugu cya Kenya ku butumire bwa Coke Studio arateganya kuzaha icyubahiro Radio mu gitaramo azahakorera.

Mu bintu bimwibutsa Radio akamwenyura, ngo harimo umunsi bahembwaga bwa mbere miliyoni yy’Amashilingi bamaze gusohora indirimbo yabo ya mbere yamamaye cyane bise Nakudata.

Weasel akaba yanavuze ko muri Kenya azaha icyubahiro Radio afatanyije n’abandi bahanzi muri Coke Studio 2019. Yavuze ko ari inshuro ya kabiri ajya muri Coke Studio, kuri iyi nshuro akazafatanya n’abandi bahanzi guha icyubahiro bagenzi babo babavuyemo nka Radio n’abandi.

Uyu muhanzi uva inda imwe n’umuhanzi Jose Chameleone wamamaye mu karere guhera muri za 95, kuri ubu ari gukora kuri album nshya izaba iriho indirimbo 15, ndetse anakora kuri album ya Radio yasize atarangije.

Click to comment

Leave a Reply

Your email address will not be published. Required fields are marked *

Mwamba.rw

Mwamba.rw is website that provides you with the latest Celebrity news, Politics, showbiz especially from  all nation of  E.A.C and all World in General.

More in ENTERTAINMENT