Connect with us

NEWS

Umuryango Kassapards wibutse kunshuro ya 24 Jenoside yakorewe Abatutsi 1994

 426 total views,  3 views today

Umuryango w’abahoze ari abanyeshuri ba Kaminuza n’amashuri makuru yo mu mujyi wa Lubumbashi no mu nkengero zawo muri RDC, ku wa 18 Gicurasi 2018 bifatanije n’imiryango ya bagenzi babo 23 bazize Jenoside yakorewe abatutsi mu muhango wo kwibuka izo nzirakangane ku Rwibutso rwa Kigali ku Gisozi.

Umuhango wo kwibuka wabanjirijwe n’ikindi gikorwa cyo kuremera umubyeyi wacitse ku icumu wo ku Ruyenzi mu Murenge wa Runda, akarere ka Kamonyi, akaba yaratewe inkunga yo kumufasha gusana inzu atuyemo.

Igikorwa cyo kwibuka nyirizina cyabimburiwe n’urugendo rwo gusura Urwibutso rwo ku Gisozi aho abacyitabiriye bashyize indabyo, gikomereza muri Centre Christus ahasomewe misa yo kwibuka , bisozwa n’umugoroba wo kwibuka waranzwe no kwereka abitabiriye amwe mu mashusho ya ba nyakwigendera aherekejwe n’ibisobanuro ku buzima bwabo bitanzwe na bamwe mu bavandimwe babo.

Hatanzwe kandi n’ikiganiro kijyanye n’umuhango wo kwibuka, kikaba cyaratanzwe na Dr Dusingizemungu Jean Pierre, Perezida w’Umuryango Ibuka.

Kayiranga Gakuba Theogene , Perezida w’Umuryango w’aba Kassapards, yasobanuye impamvu y’izina Kassapards avuga ko rikomoka ku cyicaro cya Kaminuza ya Lubumbashi ibarizwa ahitwa Kassapa mu mujyi wa Lubumbashi.

Ku birebana n’umubare w’abibutswe kuri uwo munsi, Kayiranga yasobanuye ko atari uko nta bandi ba Kassapards baba barazize Jenoside yakorewe abatutsi, ahubwo ko abo 23 aribo bamaze kubonerwa amakuru .

Yashimangiye ko ubushakashatsi bugikomeza, anasaba buri wese wagira cyangwa wazamenya amakuru yandi nkayo ko yazabigeza ku Muryango wa’aba Kassapards kugira ngo no mu zindi nshuro zizabaho zo kwibuka n’abo babonewe amakuru mashya bazibukwe, dore ko ari ku nshuro ya mbere uyu muryango ukoze iki gikorwa.

Dr Dusingizemungu Jean Pierre, Perezida wa Ibuka wari witabiriye uyu muhamgo akaba n’umushyitsi mukuru, yashimiye igikorwa cy’aba Kassapards agira ati “ iki ni igikorwa gikomeye mwakoze mu gushakisha imiryango y’abacitse ku icumu bari hano kuko bibafasha kurushaho kugira icyizere”.

Yakomeje agira ati “ birakwiye ko mu gihe cyo kwibuka tujya tugirana ikiganiro n’abacu batakiriho kabone n’ubwo tutabareba.Agahinda twatewe na Jenoside ntikagomba kutwibagiza ibyiza n’aheza twabanyemo n’abacu”.

Dr Dusingizemungu yashimangiye ko “ kwibuka ari inzira ivana mu rupfu ikaganisha ku buzima, bityo bikaba bigomba kudufasha kubaka urunana n’abacu bishwe”.

Abari bahagarariye imiryango y’aba Kassapards bazize Jenoside bahagarariwe mw’ijambo na Hon Mukarugema Manzi Alphonsine biyemeje gushyira hamwe n’Umuryango w’aba Kassapards mu bikorwa byose bijyanye no kwibuka ndetse no mu bindi byose bizabahuza.

Uyu muryango nawo wiyemeje kubaba hafi ndetse uniyemeza kuzanoza no kuzongera umubare n’imitunganyirize y’amashusho ( fil documentaire) ku mibereho y’aba Kassapards bazize Jenoside yakorewe abatutsi.

Mamaurwagasabo.rw

Click to comment

Leave a Reply

Your email address will not be published. Required fields are marked *

Mwamba.rw

Mwamba.rw is website that provides you with the latest Celebrity news, Politics, showbiz especially from  all nation of  E.A.C and all World in General.

More in NEWS