Kubera ikibazo cya Maraliya Minisante yashyizeho ko inzitiramibu izajya igura 5.000 Frw

 274 total views,  1 views today

Minisitiri y’Ubuzima yashyizeho amabwiriza agenga igurishwa ry’inzitiramubu mu gihugu, anagena igiciro ntarengwa.

Malaria ni imwe mu ndwara ifata benshi mu gihugu; Minisante igaragaza ko mu 2017 abagera ku 4,739,896 bayivuje mu mavuriro ya leta no mu bajyanama b’ubuzima, mu gihe mu 2013 hari hivuje 1,014,500. Iyi mibare ikerekana ko mu myaka itanu ishize, iyi ndwara yikubye inshuro eshanu.

Uku kwiyongera kwayo biri mu byatumye Minisante igena gahunda yihariye yo kurwanya no kurandura Malaria, gahunda ihera mu 2016 ikazageza mu 2020.

Yanakajije ingamba zirimo itangwa n’icuruzwa ry’inzitiramubu.

Muri Gashyantare 2018 Minisante yohererejwe uturere twose n’amavuriro amabwiriza ya Minisitiri w’Ubuzima N˚20/0002 agenga igurishwa ry’inzitiramubu mu Rwanda.

Ayo mabwiriza ateganya ko farumasi z’uturere zizajya zirangura inzitiramubu mu mu Kigo Cy’igihugu Gishinzwe Ubuzima (RBC) ku mafaranga 4,450 Frw, ibigonderabuzima nabyo bikazirangura ku turere ku 4,700 Frw ku nzitiramubu imwe, ikagera ku muturage ihagaze 5,000 Frw.

Ibi ariko ntibireba abaturage bo mu cyiciro cya mbere n’icya kabiri cy’ubudehe ndetse n’abo mu Cyiciro cya gatatu badafite akazi kazwi bazakomeza kuzibonera Ubuntu.

Kuri abo hiyongereyeho n’amavuriro ya leta n’afashwa nayo ku nzitiramubu zishyirwa ku bitanda by’abarwayi, Minisiteri y’Ubuzima izakomeza kuzibagezaho ku buntu.

Ku bandi, ingingo ya kabiri y’ayo mabwiriza igira iti “Abantu bose babarizwa mu cyiciro cya kane, abakozi ba leta bose n’abo mu bigo byigenga [formal sector] bari mu cyiciro cya gatatu cy’ubudehe bazajya bigurira inzitiramubu igihe bazikeneye”.

Abacuruzi bikorera ku giti cyabo nabo bahawe rugari muri ubu bucuruzi bw’inzitiramubu, gusa ibiciro bizajya bikurikiza ubwoko bw’inzitiramubu umuguzi yifuza.

Umuyobozi wa Porogaramu y’Igihugu yo kurwanya Malaria, Dr. Mbituyumuremyi Aimable, asobanura ko hari inyigo yo kureba uko mu Rwanda hashyirwa uruganda rw’inzitiramubu ku buryo zitabura ku isoko.

Yanemeje ko ibisabwa byose bihari na ba rwiyemezamirimo bifuza gushora imari muri urwo ruganda barabonetse.

Ibyo gushinga urwo ruganda rukora inzitiramubu biri mu mwanzuro wa 11 wafatiwe mu Mwiherero wa 12 w’abayobozi bakuru; uvuga “Kongera ingufu mu kurwanya malaria hibandwa cyane cyane ku bikorwa byo gukwirakwiza imiti irwanya malaria, inzitiramibu, gutema ibihuru, gutera imiti irwanya imibu mu ngo no kwiga uko mu Rwanda hashyirwa uruganda rukora inzitiramibu”.

Leave a Reply

Your email address will not be published. Required fields are marked *