Perezida Kagame arashimira Roch Marc Christian Kaboré wa Burukina Faso wagaragaje ko yifatanyije n’Abanyarwanda mu kwibuka Jenoside ku nshuro ya 24

 195 total views,  1 views today

Perezida Paul Kagame arashimira mugenzi we wa Burkina Faso, Roch Marc Christian Kaboré, nyuma yo gutangaza ko yifatanye n’Abanyarwanda mu bikorwa byo kwibuka ku nshuro ya 24 jenoside yakorewe Abatutsi.

Abicishije ku rukuta rwe rwa Twitter, Perezida Kabore yatangaje mu rurimi rw’Icyongereza ko yifatanyije n’Abanyarwanda n’imiryango yabuze ababo muri jenoside, ugenekereje mu Kinyarwanda agira ati “Nshuti yanjye Paul Kagame, nifatanyije n’Abanyarwanda n’imiryango yabuze ababo mu myaka 24 ishize muri jenoside yakorewe Abatutsi mu Rwanda, Roho zabo ziruhukire mu mahoro”.

Mu kumusubiza, Perezida Kagame na we abicishije ku rukuta rwe rwa twitter, yagize ati “ Muvandimwe Rock Kabore, urakoze cyane ku bw’amagambo yawe meza akora ku mutima kandi y’ubufatanye ku gihugu cyacu na njye ubwanjye, twishimiye kwifatanya namwe, wowe n’igihugu cyawe ku bw’umuhate wanyu mu iterambere, Imana ibahe umugisha”.

Ibihugu byombi (Rwanda & Burkina Faso) bisanzwe bifitanye umubano mwiza mu bijyanye n’ububanyi n’amahanga, ku wa 18 Nyakanga 2016, Perezida Kagame yakiriye mugenzi we, Kaboré i Kigali. Ku wa 16 Gashyantare 2018,  Roch Marc Kaboré i Ouagadougou na we yagiranye ibiganiro na Kagame, ubwo yitabiraga inama izwi nka “Munich Security Conference”.

Perezida Kagame na Kaboré, mu magambo bakunze kwandikirana, bakunze kugaragarizanya ubuvandimwe ndetse n’ubucuti. Ubwo Kagame yatsindaga amatora y’umukuru w’igihugu muri Kanama umwaka ushize, Perezida Kaboré yamutangarije ko anejejwe n’iyo ntsinzi ye.

Yagize ati “Muvandimwe Paul Kagame, ndagushimiye Paul Kagame nyuma yo gutorerwa indi manda ku buyobozi bw’u Rwanda.

Perezida Kagame na we yamusubije mu Cyongereza no mu Gifaransa mu nyandiko uwagenerekereza yagira ati “ Birashimishije cyane, urakoze muvandimwe Kaboré.”

Mu bibi n’ibyiza, aba bayobozi b’ibihugu byombi bagaragarizanya ko bari kumwe. Ku wa 13 Kanama 2017, mu murwa mukuru Ouagadougou ubwo hagabwaga igitero cy’iterabwoba, kigahitana abantu 18, Perezida Kagame yihanganishije mugenzi we Roch Marc Christian Kaboré, n’abaturage b’iki gihugu muri rusange.

Aho yagize ati “Twihanganishije abaturage ba Burkina Faso ku bw’ubuzima bw’abaguye mu gitero cy’iterabwoba uyu munsi i Ouagadougou. Nifatanyije na mugenzi wanjye Perezida Roch Marc Christian Kaboré mu kurwanya ibitero mu gace ka Sahel”.

Ibihugu byombi (Rwanda na Burkina Faso) bihuriye ku isoko rimwe mu gutwara abantu n’ibintu mu ndege (Single African Air Transport Market),…

Burkina Faso ni igihugu cyo mu Burengerazuba bwa Afurika, gituwe n’abaturage basaga miliyoni 18 [ibarura ryakozwe 2016], kikaba gifite ubuso bwa 274,200km, Perezida Roch Marc Christian Kaboré w’imyaka 60, yatangiye kukiyobora kuva mu mwaka wa 2015.

Leave a Reply

Your email address will not be published. Required fields are marked *