Radio France Inter yasabye imbabazi za nyirarureshwa

 247 total views,  1 views today

Radio ya leta mu gihugu cy’u Bufaransa, France Inter ifitanye isano na Radio Mpuzamahanga y’Abafaransa (RFI) yasabye imbabazi za nyirarureshwa umunyamategeko w’Umunyarwanda uba mu Bufaransa watanze ikirego abanyamakuru bayo guhakana Jenoside yakorewe Abatutsi mu ntangiriro z’iki cyumweru mu kiganiro bakoraga.

Izi mbabazi za France Inter zikaba zarakaje Abanyarwanda bo mu nzego zose z’ubuzima bemeza ko iyi radio ifite gahunda yo guhakana jenoside.

Mu ibaruwa yo kuwa 19 Werurwe, Richard Gisagara, umunyamategeko akaba n’umujyanama wa diaspora nyarwanda mu Bufaransa izwi nka Communauté Rwandaise de France (CRF), yanenze abanyamakuru Natacha Polony (uri ku ifoto ibumoso) na Ali baddou.

Mu buryo bwo guhakana jenoside, Natacha akaba yarashyigikiye jenoside yakorewe Abatutsi mu 1994 ndetse agatuka Abatutsi igitutsi gikomeye umuntu atasubiramo.

Umunyamategeko Gisagara akaba yarasabye ubuyobozi bw’iyi radio gufatira ibyemezo aba banyamakuru, Ali Baddou na Natacha yari yatumiye mu kiganiro.

Mu gusubiza iyi baruwa ya Gisagara, mu ibaruwa yo kuwa 23 Werurwe kuri uyu wa Gatanu ushize, Radio Inter aho gusaba imbabazi za nyazo yagerageje gukingira ikibaba Natacha.

Umuyobozi w’iyi radio, Laurence Bloch akaba agira ati: “Rwose mwumve ko nyuma yo kumva icyo kiganiro cyatambutse kivugwa, nanjye natunguwe n’amagambo yakoreshejwe na Natacha Polony wa France Inter nzi neza nk’umunyamakuru w’umunyamwuga wok u rwego rwo hejuru.”

Muri iyi baruwa yakomeje avuga ko ashyigikiye Umuryango Nyarwanda mu Bufaransa kandi asangiye nabo amarangamutima batewe n’iki kiganiro.

Ati: “Mu bigaragara ntibyumvikana ukuntu ayo magambo yo guhakana nk’ayo ashobora kunyuzwa kuri France Inter kandi akemerwa nk’ukuri.”

Inkuru dukesha KTPress ivuga ko Bloch yasabye imbabazi bya nyirarureshwa ariko hagati nawe agasangiza ubutumwa bugaragaza aho ahagaze mu by’ukuri ku buryo ntaho ataniye mu by’ukuri n’abo banyamakuru bavugwaho guhakana Jenoside.

Aha hakaba havugwa nk’aho yakomeje avuga ko muri iki kiganiro hari n’aho yavuze kabiri ko Atari guhakana ukuri kwa Jenoside yakorewe Abatutsi.

Ngo yanafunguye ikindi gika agerageza kuyobya azana imbabazi ku buryo itangazo rye riteye urujijo ku buryo utapfa kumva icyo yageneye abamwumva.

Ku ruhande rw’umunyamategeko Gisagara, ngo igisubizo cya France Inter ni cyiza ariko ntabwo banyuzwe.

Ati: “Ntibigeze basaba imbabazi na busa.

Uyu munyamategeko wasesenguye amagambo ari mu ibaruwa ya Bloch, avuga ko yagaragaje kwicuza ariko ntasabe imbabazi.

Gisagara akomeza avuga ko mu ibaruwa ye batifuzaga gusa ko basaba imbabazi ahubwo bifuzaga kumenya ibyemezo bazafatira aba banyamakuru ariko umuyobozi wa radio ntacyo yabivuzeho.

Umunyamabanga Nshingwabikorwa wa Ibuka-France, Naphtal Ahishakiye, we avuga ko igisubizo cya France Inter kigaragaza neza umugambi wayo wo guhakana jenoside ku mugaragaro.

Avuga ko mbere na mbere umuyobozi wa radio yari akwiye guhagarika uyu munyamakuru Natacha ndetse agafatanya n’ubutabera mu kumugeza imbere y’amategeko kuko jenoside ari icyaha kibasiye inyokomuntu.

Leave a Reply

Your email address will not be published. Required fields are marked *